انا رجعت تاني رجعت تاني للكتابه

كل عام وأنتم بخير

رمضان كريم

الـيـلـه عـيـد

اليله عيد والعريس هيتجوز

*

*

*

*
بمأن العريس هيتجوز يبقي العروسة هتتجوز

*

*

*

*
العريس متين والعروسة متينة

العريس والعروسه

كفاية كده أنا كنت بعبر عن فرحتى بزواج عريس الأمة زينة شباب مصر (ده لو كان فيه شباب أصلا ) النهارده أخوانى وأخواتى زواج أبن الريس الصغير أخر العنقود السكر الجميل الطيب اللي فيه كل حاجه حلوه وأحنا فينا كل حاجه وحشه ماعلينا النهارده الفرح علي الأنسة موني أو خديجة (ماعرفش ايه اللي جاب موني لخديجة ) المهم الفرح النهارده والمعازيم هيكون بابا وماما وعلاء ومراته والأولاد وبوش وألومرت وبلير وكل من ساعد علي هدم الأمة العربية والكيان العربي ونعتذر لعدم عزومة الشعب علشان أنتم عارفين أنها حاجة عائليه وعلي القد قوي ليله هتخلص بسرعة

عيب بعد الجواز

مكان الحفل شرم الشيخ وقد قامت مشكورة أسرائيل بتأمين المنطقة من الأوباش المصريين حتي لا يعكروا صفوا الحفل

وأحب أن أتقدم الي كل من ساهم في الفرح بالشكر واخص أسرائيل وأمريكا وتمنياتنا للرئيس المقبل زواجا سعيد (بس عايزو أفهم حاجه لما جمال يمسك ويكون الريس هنقول ماما موني ولا ماما خديجة والنبي حد يقولي علشان ماأغلطش) وحاجه تانيه أحنا هنحنفل بعد كده بميلاد الريس ولا فرح الريس ولا ايه بس علشان والله مافاهم حاجه

مونى ومامتها

أنا قرأت هذه الحكايه من أحد المنتديات عن عضو فى حركة كفاية أقرأوا
رغم أنى تكلمت مع خديجة بشكل شبه مستفيض (في جلسة جماعية ضمت بعض أصدقائي وأصدقائها ) ألا أن هذه المره لايمكن أن تسقط من ذاكرتيأو ذاكرة أي حد حضرهالأن خديجة من الناس اللي صعب جدا تقابلها مرتين في حياتك أنا أسف لأني مش هقدر أقول عنها كتير لأني ماسمحش لنفسي بكده لكن يكفي اني أقول أنها ماكنتش تعرف ان فيه حاجه أسمها ربع جنيه مخروم وأضريت أني أدور علي واحد علشان تمسكه بأيديها وتتأكد أنه موجود فعلا وأني ماكنتش بهزر معاها

مبروك ياعروسة

أنا جالي ظغط وسكر وقلب وأستبحس لأ أستنوا أقرأوا ده كمان

جريدة المصريون الالكترونية لتقرأ تقريرا عن ان : "فستان العروس بـ150 ألف جنيه.. ومصمم عالمي لخاتم خطوبة جمال مبارك" ولكن كثيرون شككوا في في ان تكون تكلفة الفستان 150 الف جنيه فقط معللين ذلك بان ساعة واحدة من تلك التي يرتديها جمال مبارك ب175 الف جنيه

طيب لما فستان الخطوبة بالتمن ده أمال فستان الفرح هيبقي بكام

والله الواحد مش معترض أن حد يتجوز ده شئ جميل ولا مفر منه ولكن النصيحة اللي نقولها لعلاء مبارك خديجة أه مصر لألألأ وألف لأ

وشـكـرا

مـصـر

وصلتنى أمس أحدي رسالة علي البريد الألكتروني الخاص بي من أحد الأصدقاء وكان يتكلم عن المدونة بتاعتي وبعض المدونات الأخرى ووصفنا أننا نكتب فى هذه المدونات من أجل بعض المصالح وأننا لا يعجبنا شئ في البلد وفضحنا البلد من الأخر

حبيت أرد عليه من خلال المدونة بتاعتي أننا مصريون ونحب مصر جدا وتراب وشعب وأهل مصر ولهذا نحن نكتب فليس من حبنا لمصر أن نري بعض السلبيات ونسكت عليها حتى لاننفضح أمام العالم مجرد سكوتنا علي هذه السلبيات هي الفضيحة

أخي في كل بلاد العالم يوجد سلبيات وأيجابيات وأنا من الناس اللي سافرت للخارج ورأيت بعيني نعم عندهم أيجابيات كثيره ولكن عندهم سلبيات أيضا كثيرة ولكنهم لا يسكتون عن سلبياتهم ويحلونها متضامنين مع بعضهم

هنا في مصر يوجد سلبيات وأيجابيات كثيره ولكننا سلبياتنا أكتر من أيجابيتنا ولا نحاول حتي التطرق الي هذه السلبيات نغلق أعيننا وعقولنا ونعطيهم لغيرنا وتنتشر الكلمه الشهيره (كله تمام ياباشا) ايه هوه اللي تمام ايه هوه اللي كويس ياأخي لوتكلمنا علي أتفه الأسباب لايوجد شارع في مصر مرصوف كويس لا يوجد شارع في مصر فيه أناره سليمه لا يوجد في مصر لا تنتشر فيه أعمال البلطجة يوجد مناطق وبلاد في مصر لايوجد بها ماء أو كهرباء أو صرف صحي أو اي خدمه علاجيه أو أي شئ هوه ده اللي كله تمام هوه ده اللي كله كويس

أنتشار المقاهي وأنتشار العاطلين عن العمل وأنتشار الأمراض أنتشار الحوادث الناتجة عن الأهمال وأنتشار أكثر من ذلك أنا لاأتكلم عن أمور سياسية فهذه ليست عملي أو شغلي في الوقت الحالي ياأخي يجب أن نري مصر في أجمل صوره وهذا من حقنا توجد العديد من الول التي كانت خلفنا ونسبقها بسنين سبقتنا وأصبحت لها مكانه أكبر من مصر

ياأخى لماذا نعطي ظهورنا للمشاكل دائما ونخاف منها ونهرب منها يجب أن نواجهها بكل حزم

أحب أن أذكر لك حكايه بسيطه وأنا في الخارج هبت عاصفه ثلجية شديده جدا وكل الطرق أغلقت فأتصلت أحدي السيدات بالشرطه أنها قد حجزت علي الطريق هي وأبنها الذي لا يتعدي عمره 8 سنوات والسياره لاتعمل ولا تعرف ماذا تفعل أرسلوا لها ثلاث طائرات للأنقاذها هي وطفلها أما هنا في مصر العبارات بتغرق والطيارات بتقع والقطارات بتولع ونهرب أصحابها ونستقبلهم في بيوتنا

ياأخي احنا زهقنا من اللي بيحصل هنا أحنا زهقنا من السلبيه التي أصبحت سمه أساسية في الشعب المصري وحاله اللامبالاه والفساد والبلطجة المنتشرة بشده داخل مجتمعنا المصرى

أخي نحن نحب مصر ونموت فيها ولهذا سوف نظل نكتب ونكتب حتي ينصلح حال هذه البلد وينصلح حال هذه الشعب

وشـكـرا

مـعـمـلوهـاش الأبـطـال

أنا أصلا ماكنتش عايز أكتب حاجه عن الماتش ده حتى لو فوزنا ولكن أنا تضايقت شويه بعد الماتش أولا مش من النتيجة ده مباراه ودية أحتفالية مالهاش أى قيمة فى الفوز أو الهزيمه ألي ضايقنى بعض الأشياء ونبتديها من الأول


أولا : تذاكر المباراة ده كانت حكاية ورواية ولعبة وفى الأخر أنضحك علي الشعب كله مش جمهور النادى الأهلى بس للأن كان فيه أكتر من جمهور وأكتر من جنسيات طيب أزاى أنضحك علينا أقولكم أنا المفروض ان تذكره الدرجه التالته 35 جنيه والتانيه علي ما أعتقد 50 جنيه حاجه كده ووصلت المقصوره علي ما أعتقد 1500 جنية عظيم ده الأسعار الموجوده علي التذاكر طيب أحنا دفعنا مليون ونص دولار لنادى برشلونة علشان يجى يلعب هنقول الأهلى مادفعش حاجة واللي دفع الشركات الراعية طيب الناس ده تجيب حقها منين التذاكر + الأعلانات مش هتجيب فلوس طيب نعمل زى اليهود أه زى اليهود عملوا ايه التذاكر خلصت نعم أزاى ده لسه مانزلتش بص وراك التذاكر موجوده بكام ياعم ب 200 جنيه ايه خلاص مش عايز ماتروحش أزاى ده برشلونه ده ايتو و ميسى وديكو و رونادلينهو يعنى ناس تقيله خلاص أدفع أدفع أحنا هنحسب أنهم باعوا كل التذاكر ب 200 جنيه مش هنحسب أم 1000 ولا 2000 كلها 200 جنيه فى سبعين ألف يعني 14000000 بالأضافة للأعلانات يعني الماتش زى الفل جاب حقه وزياده ومكسبة ومكسب ناس مالناش دعوه بيهم . والله اليهود أتبروا منكم


ثانيا : الملعب ياجماعه أرضيه كانت زي الزفت بصراحة وعلي لسان أدارى ولعيبة برشلونه وكل ما أفتكر 59 مليون جنية اللي أنصرفوا علي الأستاد أضايق جدا


ثالثا : وده المهم جدا بالنسبة ليا مستوى لعيبة النادى الأهلى في الماتش ده كان شئ لا يوصف أنا ماكنتش متوقع الفوز ولكن متوقع أننا هنلعب كويس هنلعب كورة زى اللي همه بيلعبوها مش اللي أحنا بنلعبها وثبت بالدليل القاطع ان اللي أحنا بنعمله ده مش كورة ده ملوخية ما علينا ده ماتش ومفيش مشكلة أنك تتغلب ده متوقع يبقى ألعب اللعيب اللي حسيت أنه فعلا عايز يعمل حاجة هوه أحمد عادل اللي أول ماشفته نازل الماتش قولت ده نازل يعمل ايه وأبوتريكه ياسلام على أبو تريكة عايز يرقص الفريق كله والي الأخ عماد متعب أنا بنصحه أنه يدبح عجل ويعدي عليه سبع مرات زى الوالده وكابتن الكباتن أنيس بوجلبان اللي كانت كل باصاته مقطوعه تذكرت وأنا بشوفه جابوا قبل الماتش المطرب صابر برشه قصدي صابر الرباعى قال أيه بيقول مبروك على الأهلى أنه بيلعب فيه لعيب كبير بحجم أنيس بوجلبان ياعم برشه أنت بقى وخليك فى اللي أنت فيه


المهم وصلنا لخط الدفاع ياجماعه أنا لا ولن أثق فى خط دفاع الأهلى من شادي الي وائل الي محمد صديق عماد النحاس بدأ يهبل والأجوان كلها من عندك ياباشا زى جون كأس العالم للأنديه وأحمد السيد الوحيد اللي أنا بثق فيه فى خط دفاع الأهلى كله وعصام الحضرى ياعيني أنا كان نفسي أعرف اللبانه راحت فين


أنا أهلاوي وأهلاوي متعصب كمان وأنا بنقض اللي شفته يعني ماجيش علي الأنترنت ألقي موقع من مواقع أبو خطين حمر يقولك أربعه ومربعه والموقع التاني يقولك عمرو أديب مين عمرو أديب ده هوه كل واحد طلع يهاجم الأهلي يبقي بطل


فزنا علي ريال مدريد قالوا ده طلعوا عنيهم وودوهم الأهرامات فزنا علي روما قالوا أنتم بوظتم أرضيه الملعب علشان مايعرفوش يلعبوا رحنا كاس العالم للأنديه وخدنا التالت وعملنا ماتشات جامده قالوا ده علشان مفيش فرق جامده


يخرب بيوتكم العيب فينا أحنا علشان سايبنكم عايشين علي الأرض أحسن حاجه نحطكم كلكم داخل كهف ونقفل عليكم ليوم القيامة علشان نرتاح


المهم هيه أحتفاليه للمؤية وكنا عايزين نشوف لعيبه جامده زى ده


مئوية الأهلى

ويعنى اللي عنده لعيبه زى ده هيتغلب برده ده حتي جودجونسون اللي أنا مبحبوش ومالوش فيها عمل ماتش كويس


هيه ده اللعيبه ولا بلاش

الواد ده كان بيتمنظر علينا

علي العموم أبطال الأهلي همه الأبطال همه الوحوش همه الرجاله علي طول غصب عن أبو خطين حمر والفريق التانى اللي عندهم الصفرا دول وغصب عن أي حد في أى مكان أو زمان

أبسط دليل لحبنا للأهلى

أخيرا وليس أخيرا أن النادى الأهلي بيلعب مع أكبر فرق العالم ممكن يتغلب وممكن يفوز ماننهزمش من أضعف فرق

العالم زى فرق أخرى ويكفي أن أكبر صحيفة أسبانية كتبت أن نادى برشلونة تاني العالم يقابل الأهلى تالت العالم في

مئوية الأهلى وده كفاية جدا

جدو حسام

حاجه بس حبيت أضيفها هوه الكابتن حسام حسن ماله قبل الماتش قال ماحدش عزمنى الكابتن هادى خشبه عزمه بعدين يقولك هادى حبيبي بس همه كده هانوني وجرحوا كرمتي أنت عايز نطلعلك مختار التتش من تربته علشان يجيبك ومصر كلها تتحايل عليك أنت وأخوك وبعد الماتش الباشا الكبير قاعد يحلل وينتقد ياعم كفايه شماته بقى خليكم في حالكم وأقعدوا في الدورى الأول وبعدين أبقى حلل أداء الأهلى وحلل أداء برشلونة كفايه بقى

وكل مئوية وأنت طيب ياأهلى

وكلمه أخيره معملوهاش الأبطال الحمد لله أنى ماكنتش معاهم

وشـكـرا

المـصـرى هـيـفـضـل مـصـرى

وصلتنى هذه الرساله علي البريد الألكترونى الخاص بيا من أحد أصدقائى وعجبتنى جدا علشان فيهابعض الحقائق الظريفة

أيوه... إحنا المصريين مختلفين عن الآخرين

المصري هو اللّي

ممكن يعدي التلاتين ولسه عايش مع أمه وأبوه وماعندهوش مشكلة

بيفهم في الطب ويشخص المرض ويوصفلك الدوا وبيفهم في النقاشة والكهربا وتصليح العربيات والطبيخ والسياسة والكورة وهو أبيض ياورد

يحط الريموت كونترول في كيس بلاستيك كعادة فرعونية

قف يتكلم على الباب نص ساعة بعد إنتهاء الزيارة والسلام

لمّا تفتح نملية المطبخ هتلاقي عنده عشرين برطمان بتاع مربى فاضي بقالهم سنين ومازال مُصِر على جمع المزيد

ييجي بعد معاده بساعتين ويفتكر إن ده عادي

لسه عنده إصرار إنه يتكلم بصوت عالي في التليفون لما تكون المكالمة دولية عشان التاني يسمعه

بيعتبر نفسه أفضل واحد في الشرا والفصال وبعد كده يكتشف إن الحاجة في المحل اللي جنبه أرخص من غير فصال

بيحتفظ بأكياس محلات اللبس والأحذية وورق الهدايا تحت مرتبة السرير لسنوات ومابيستخدمهاش

عنده صينية مكسرات متقسمة لتلات او أربع أقسام لزوم المزاج وعمره ماإستخدمها

يشتري قبل الفطار في رمضان مواد إستهلاكية أصلا موجود عنده في البيت لسه ماستخدمهاش

بيكون عنده شواية لزوم الرحلات أقصى استخدام لها كان مرة واحدة في العيد

بيشيل طابع البريد من على الظرف لو الختم ماكانش عليه

بيفتكر إن أي حد بيشتغل في الخليج بيغرف فلوس من غير حساب

يكون مشغول بقيمة التيبس أو البقشيش طول العشا ياترى ربع جنيه ولا نص جنيه

رده بيتخانق ساعة دفع الحساب بحرارة شديدة على إنه هو اللي لازم يدفع

سرقوا منه العربية بس مشكلته هي المايتي زينجر

بيفرش ملاية سرير على طقم الأنتريه عشان يفضل نضيف لما ييجي ضيوف ومابيشيلهاش لما ييجوا

والأهم إنه اللي بيحب يسخر من نفسه ومن بلده وحكامه بس مايطيقش حد تاني يسخر منهم ، وساعتها بيفرش له الملاية

فعلا المصري هيفضل مصري

وشـكـرا

تزوير الدستور - حشد الطالبات للتصويت بنعم

وده كمان بس أنا علي ماأعتقد أنهم مش طلبه